لاہور: گھروں میں وارداتیں کرنے والے 2 پولیس اہلکار اور ہنی ٹریپ میں ملوث 3 ملزمان گرفتار

لاہور میں صدر ڈویژن پولیس نے گھروں میں وارداتیں کرنے والے  2 پولیس اہلکاروں  اور  ہنی ٹریپ میں ملوث  3 ملزمان کو گرفتار کر لیا۔

ایس پی صدر  رانا حسین طاہر نے اپنے دفتر میں پریس کانفرنس کرتے ہوئے بتایا کہ چوہنگ پولیس نے گھروں میں وارداتیں کرنے والے گروہ میں شامل 2 پولیس اہلکاروں سمیت 3 افراد کو  گرفتار کر لیا ہے۔

ایس ایس پی کے مطابق گرفتار  ملزمان میں پولیس اہلکار  علی حیدر، برطرف اہلکار  راحت علی اور  ساتھی شامل ہیں، ملزمان سے لوٹےگئے کروڑوں مالیت کے زیورات، نقدی اور   اسلحہ برآمد کرلیا گیا۔

ادھر نواب ٹاؤن پولیس نے ہنی ٹریپ کی وارداتیں کرنے والےگروہ کے 3 ارکان رضا، خرم اور سلیمان کو گرفتار کرلیا۔

ملزمان آن لائن خریداری پر ڈسکاؤنٹ دینےکا جھانسہ دے کر شہریوں کو بلاتے ،برہنہ ویڈیوز بنا کر تشدد کرتے اور نقدی، قیمتی سامان لوٹ لیتے تھے۔