سشمیتا سین نے دل کی سرجری سے قبل اینستھیزیا کیوں نہیں لیا تھا؟

سابقہ مس یونیورس سشمیتا سین کو 2023 میں دل کا دورا پڑا تھا اور اس حوالے سے اداکارہ نے حال ہی میں ایک انکشاف کیا ہے۔

ایک انٹرویو میں اداکارہ نے بتایا کہ انہوں نے دل کے آپریشن سے قبل بے ہوشی کا انجیکشن لینے سے منع کردیا تھا کیونکہ اس خیال نے انہیں شدید خوف میں مبتلا کردیا تھا کہ وہ اسٹنٹ ڈالنے کے عمل سے بالکل لاعلم ہیں۔

سشمیتا سین نے کہا کہ  میں نہیں چاہتی تھی مجھے سیڈیٹ کیا جائے، میں جاگتے ہوئے سب کچھ دیکھنا چاہتی تھی، مجھے دیکھنا تھا کہ یہ سب کیا ہورہا ہے۔

اداکارہ کا کہنا تھا کہ یہ سب دیکھنا خوفناک تھا لیکن یہ سب نہ دیکھنا اس سے بھی زیادہ ڈراؤنا تھا، سرجری کے وقت میں نے ڈاکٹرز کو یہ بھی کہا کہ یہ پروسیجر جلدی کریں تاکہ میں اپنے کام پر واپس جاسکوں۔

واضح رہے کہ سشمیتا کی 95 فیصد شریانیں بند تھیں جس کی وجہ سے ان میں فوری اسٹنٹ ڈالنے کی ضرورت تھی۔