برطانوی شہزادہ اینڈریو کا 'ڈیوک آف یارک' کا لقب چھوڑنےکا اعلان

برطانوی شہزادہ اینڈریو  نے  'ڈیوک آف یارک' کا لقب چھوڑنےکااعلان کردیا۔ شہزادہ اینڈریو کا کہنا ہے تمام اعزازات اور القابات کا استعمال ختم کر رہا ہوں۔

برطانوی شہزادہ پرنس اینڈریو نے کہا کہ یہ فیصلہ بادشاہ چارلس کے ساتھ مشاورت کے بعد کیا گیا۔

پرنس اینڈریو نے بیان میں کہا کہ وہ اب بھی پرنس کے طور پر جانے جائیں گے لیکن وہ آئندہ اپنے شاہی خطابات استعمال نہیں کریں گے، انہوں نے بتایا کہ ان کی والدہ آنجہانی ملکہ الزبتھ دوم کی جانب سے دیا گیا لقب 'ڈیوک آف یارک'  بھی واپس کر دیا گیا ہے۔

برطانوی میڈیا کے مطابق پرنس اینڈریو کی سابقہ اہلیہ سارہ فرگوسن  بھی اب شاہی القابات کا استعمال نہیں کریں گی جبکہ ان کی بیٹیاں شہزادی بیٹریس اور شہزادی یوجینی بدستور   شہزادی کے القابات برقرار رکھیں گی۔

یاد رہے کہ شہزادہ اینڈریو  پر   جنسی جرائم میں ملوث جیفری ایپسٹین سے تعلقات پر  طویل عرصے سے تنقید جاری تھی تاہم شہزادہ اینڈریو  نے ان الزامات کی ایک بار پھر سختی سے تردید کردی۔