معاہدے کی پاسداری نہ کرنے پر حماس کو ختم کردیں گے: ٹرمپ

امریکی صدر ڈونلڈ ٹرمپ نے کہا ہےکہ وہ چاہیں تو  اسرائیل کو غزہ میں واپس بھیج کر حماس کو ختم کرنے کا حکم دے سکتے ہیں۔

صدر ٹرمپ نے وائٹ ہاؤس میں صحافیوں سے گفتگو  کرتے ہوئے کہا کہ انہوں  نے حماس کے ساتھ ایک معاہدہ کیا ہے اور  توقع ہےکہ وہ اچھا برتاؤکریں گے، صدر ٹرمپ نے دھمکی دی کہ اگر  ایسا نہ ہوا تو حماس کو  ختم کرنا پڑے گا۔

ٹرمپ کا کہنا تھا کہ اگر وہ حکم دیں تو  اسرائیلی فوج 2 منٹ میں غزہ کے اندر جاکر حماس کا خاتمہ کرسکتی ہے۔

ٹرمپ نے کہا کہ وہ فلحال معاملے کو ٹھنڈا رکھنے اور جنگ بندی کو قائم رکھنے کی پالیسی اختیار کر رہے ہیں۔

یاد رہے کہ چند روز قبل بھی امریکی صدرنے خبردار کیا تھا کہ اگر حماس جنگ بندی معاہدے کی شرائط پر عمل نہیں کرتی تو وہ اسرائیل کو غزہ میں دوبارہ فوجی کارروائی کی اجازت دے دیں گے۔

سی این این کو دیے گئے انٹرویو میں صدر ٹرمپ کا کہنا تھا کہ حماس نے اب تک 28 میں سے زیادہ تر یرغمالیوں کی لاشیں واپس نہیں کیں۔