وزیراعظم آزاد کشمیر چوہدری انوارالحق نے مستعفی ہونے کیلئے شرط عائد کردی

مظفرآباد: وزیراعظم آزاد کشمیر چوہدری انوارالحق نے مستعفی ہونے کے لیے شرط عائد کردی۔

ذرائع کے مطابق چوہدری انوار الحق نے حامی وزراء اور اراکین اسمبلی کے لیے ترقیاتی فنڈز اور جاری منصوبوں کی گارنٹی مانگ لی ہے۔

ذرائع کا کہنا ہے کہ چوہدری انوار الحق نے مطالبہ کیا ہے کہ ن لیگ کے وزراء اور ٹکٹ ہولڈرزکوبھی آئندہ الیکشن سے قبل برابری کی بنیاد پرفنڈز دیے جائیں۔

خیال رہے کہ مسلم لیگ ن اور پیپلز پارٹی وزیراعظم آزاد کشمیر چوہدری انوار الحق کے خلاف تحریک عدم اعتماد پر اتفاق کر چکی ہیں اور ذرائع کا اس حوالے سے بتانا ہے کہ پیپلز پارٹی کو تحریک عدم اعتماد کے لیے 36 ارکان کی حمایت حاصل ہو چکی ہے۔

دوسری جانب چوہدری انوار الحق نے بھی تاحال وزارت عظمیٰ سے استعفیٰ  نہیں دیا ہے اور ان کا کہنا ہے کہ اگر نمبرز پورے ہیں تو تحریک عدم اعتماد لے آئیں۔